ਆਜ਼ਾਦ ਉਮੀਦਵਾਰ ਦੇ ਸਮਰਥਕਾਂ ਵੱਲੋਂ ਧੱਕੇਸ਼ਾਹੀਆਂ ਖ਼ਿਲਾਫ ਟਰੈਫਿਕ ਜਾਮ

ਪਾਤੜਾਂ 14 ਫ਼ਰਵਰੀ  (ਸੰਜੇ ਗਰਗ )

ਨਗਰ ਕੌਂਸਲ ਪਾਤੜਾਂ ਦੀਆਂ ਹੋ ਰਹੀਆਂ  ਚੋਣਾਂ ਦੌਰਾਨ ਵਾਰਡ ਨੰਬਰ ਇੱਕ   ਤੋਂ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਨਿੱਤਰੇ ਸਾਬਕਾ ਕੌਂਸਲਰ  ਸ੍ਰੀਮਤੀ ਬਲਜਿੰਦਰ ਕੌਰ  ਦੇ ਸਮਰਥਕਾਂ ਨੇ ਕਾਂਗਰਸੀ ਉਮੀਦਵਾਰ ਉੱਤੇ ਪੋਲਿੰਗ ਬੂਥ ਤੇ ਕਬਜ਼ਾ ਕਰਨ ਦੇ ਦੋਸ਼ ਲਗਾਉਂਦਿਆਂ ਪਾਤੜਾਂ ਪਟਿਆਲਾ ਮੁੱਖ ਮਾਰਗ ਉੱਤੇ  ਸੰਗਰੂਰ ਰੋਡ ਕੈਂਚੀਆਂ ਵਿੱਚ ਧਰਨਾ ਲਗਾ ਕੇ  ਟਰੈਫਿਕ ਜਾਮ ਕੀਤੀ ਗਈ।

 ਇਸ ਦੌਰਾਨ ਇਕੱਠੇ ਹੋਏ ਲੋਕਾਂ ਨੇ ਚੋਣ ਦੌਰਾਨ  ਕਾਂਗਰਸ ਪਾਰਟੀ ਵੱਲੋਂ ਕੀਤੀਆਂ ਗਈਆਂ ਧੱਕੇਸ਼ਾਹੀਆਂ ਖ਼ਿਲਾਫ਼ ਜ਼ੋਰਦਾਰ ਨਾਅਰੇਬਾਜ਼ੀ ਕਰਦਿਆਂ ਚੋਣ  ਤੁਰੰਤ ਰੱਦ ਕਰਨ ਦੀ ਮੰਗ ਕੀਤੀ  ਹੈ ।

         ਧਰਨੇ ਉਤੇ ਬੈਠੇ  ਆਜ਼ਾਦ ਉਮੀਦਵਾਰ ਬਲਜਿੰਦਰ ਕੌਰ,  ਉਸਦੇ ਪਤੀ ਕੁਲਦੀਪ ਸਿੰਘ, ਰਾਜਵਿੰਦਰ ਕੌਰ, ਬਲਜੀਤ ਸਿੰਘ , ਜਸਪ੍ਰੀਤ ਸਿੰਘ, ਸਾਬਕਾ ਕੌਂਸਲਰ ਤਰਸੇਮ ਸਿੰਘ   ਅਤੇ ਸਾਬਕਾ ਸਰਪੰਚ ਸ਼ੁਤਰਾਣਾ ਭਗਵੰਤ ਸਿੰਘ ਨੇ ਦੋਸ਼ ਲਗਾਇਆ ਕਿ ਕਾਂਗਰਸੀ ਉਮੀਦਵਾਰ ਦੇ ਸਮਰਥਕਾਂ ਵੱਲੋਂ ਸਵੇਰ ਤੋਂ ਹੀ ਜਾਅਲੀ ਵੋਟਾਂ ਪਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ ਇਸ ਦੌਰਾਨ ਦੁਪਹਿਰ ਦੋ ਵਜੇ ਦੇ ਕਰੀਬ  ਕੁਝ ਵਿਅਕਤੀਆਂ ਨੇ ਪੋਲਿੰਗ ਬੂਥ ਉੱਤੇ ਕਬਜ਼ਾ ਕਰਕੇ ਜਾਅਲੀ ਵੋਟਾਂ ਪਾਉਣੀਆਂ ਸ਼ੁਰੂ ਕਰ ਦਿੱਤੀਆਂ  ਗਈਆਂ, ਇਸ ਦਾ ਵਿਰੋਧ ਕਰਨ ਤੇ  ਪੁਲਸ ਪ੍ਰਸ਼ਾਸਨ ਨੇ ਉਨ੍ਹਾਂ ਦੇ ਸਮਰਥਕਾਂ ਨੂੰ  ਇੱਥੇ ਭਜਾਉਣ ਦੀ ਕੋਸ਼ਿਸ਼ ਕੀਤੀ । ਉਨ੍ਹਾਂ ਕਿਹਾ ਕਿ  ਪ੍ਰਸ਼ਾਸਨ ਨੇ ਇਨ੍ਹਾਂ ਚੋਣਾਂ ਦੌਰਾਨ  ਕਾਂਗਰਸ ਦੀ ਕਠਪੁਤਲੀ  ਬਣ ਕੇ ਕੰਮ ਕੀਤਾ । ਉਨ੍ਹਾਂ  ਮੰਗ ਕਰਦਿਆਂ ਕਿਹਾ ਹੈ ਕਿ  ਕਾਂਗਰਸ ਨੇ ਕੋਝੇ ਹੱਥਕੰਡੇ ਵਰਤ ਕੇ  ਲੋਕਤੰਤਰ ਦਾ ਕਤਲ ਕੀਤਾ ਹੈ  ਇਸ ਲਈ ਇਸ ਚੋਣ ਨੂੰ ਟਰੇਨ ਤੁਰੰਤ ਕੀਤਾ ਜਾਵੇ  ।

        ਦੂਜੇ ਪਾਸੇ   ਕਾਂਗਰਸੀ ਉਮੀਦਵਾਰ ਸੁਪਨਦੀਪ ਕੌਰ ਕਾਹਲੋਂ   ਦੇ ਸਹੁਰਾ ਅਤੇ ਮਾਰਕੀਟ ਕਮੇਟੀ ਪਾਤੜਾਂ ਦੇ ਸਾਬਕਾ ਚੇਅਰਮੈਨ ਜੈ ਪ੍ਰਤਾਪ ਸਿੰਘ ਡੇਜ਼ੀ ਨੇ ਕਿਹਾ ਹੈ ਕਿ  ਆਜ਼ਾਦ ੳੁਮੀਦਵਾਰ  ਬਲਜਿੰਦਰ ਕੌਰ ਦਾ ਪਤੀ ਕੁਲਦੀਪ ਸਿੰਘ ਰੇਡੂ ਅਕਾਲੀ ਦਲ ਦੀ ਜਥੇਬੰਦੀ ਐਸ ਓ ਆਈ  ਦਾ ਬਲਾਕ ਪ੍ਰਧਾਨ ਰਿਹਾ ਹੈ ਅਤੇ ਉਸਦੇ ਬੁਲਾਏ ਹੋਏ ਗੁੰਡਿਆਂ ਵੱਲੋਂ ਪੁਲਿਸ ਪ੍ਰਸ਼ਾਸਨ ਉੱਤੇ ਪੱਥਰਬਾਜ਼ੀ ਕੀਤੀ ਗਈ । ਆਪਣੀ ਹਾਰ ਹੁੰਦੀ ਦੇਖ ਕੇ ਉਨ੍ਹਾਂ ਚੋਣ ਦਾ ਸਮਾਂ ਲੰਘਣ ਮਗਰੋਂ ਚੌਕ ਵਿੱਚ ਟ੍ਰੈਫਿਕ ਜਾਮ ਕਰਨ ਦਾ ਡਰਾਮਾ ਕੀਤਾ ਹੈ  ।

ਫੋਟੋ  :   ਪਾਤੜਾਂ ਵਿਖੇ ਕੀਤੀ ਗਈ ਟ੍ਰੈਫਿਕ ਜਾਮ ਦਾ ਦ੍ਰਿਸ਼।