ਪਾਰਕਿੰਗ ਦੇ ਪੈਸੇ ਮੰਗਣ ‘ਤੇ ਦੋ ਗੁੱਟਾਂ ‘ਚ ਹੋਈ ਝੜੱਪ

ਪਟਿਆਲਾ, 14 ਫਰਵਰੀ (ਰੁਪਿੰਦਰ ਸਿੰਘ) : ਥਾਣਾ ਕੋਤਵਾਲੀ ਪਟਿਆਲਾ ਦੀ ਪੁਲਸ ਨੇ ਪੁਰਾਣੀ ਕਬਾੜੀ ਮਾਰਕੀਟ ਦੇ ਗਰਾਊਂਡ ਵਿੱਚ ਪਾਰਕਿੰਗ ਦੇ ਪੈਸੇ ਮੰਗਣ ‘ਤੇ ਦੋ ਗੁੱਟਾਂ ‘ਚ ਹੋਈ ਝੜੱਪ ਦੌਰਾਨ 4 ਖਿਲਾਫ ਮਾਮਲਾ ਦਰਜ਼ ਕੀਤਾ ਹੈ। ਦੋਸ਼ੀਆਂ ਦੀ ਪਹਿਚਾਣ ਤੇਜਪਾਲ ਸਿੰਘ ਅਤੇ ਮੱਛੀ ਵਜੋਂ ਹੋਈ ਹੈ, ਜਿਨ੍ਹਾਂ ਦੇ ਨਾਲ 2 ਹੋਰ ਅਣਪਛਾਤੇ ਵਿਅਕਤੀ ਸ਼ਾਮਲ ਸਨ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕੁੱਟਮਾਰ ਦਾ ਸ਼ਿਕਾਰ ਹੋਏ ਜਤਿਨ ਧੀਮਾਨ ਪੁੱਤਰ ਰਜਿੰਦਰਪਾਲ ਧੀਮਾਨ ਨੇ ਦੱਸਿਆ ਕਿ ਉਹ ਆਪਣੇ ਦੋਸਤ ਮਨਵੀਰ ਸਿੰਘ ਦੇ ਨਾਲ ਕਾਰ ਨੰਬਰ ਪੀ.ਬੀ. 11ਸੀਵੀ 6066 ‘ਤੇ ਸਵਾਰ ਹੋ ਕੇ ਪੁਰਾਣੀ ਕਬਾੜੀ ਮਾਰਕੀਟ ਦੇ ਗਰਾਊਂਡ ਵਿੱਚ ਗਿਆ, ਜਿਥੇ ਉਕਤ ਦੋਸ਼ੀ ਤੇਜਪਾਲ ਉਸ ਤੋਂ ਪਾਰਕਿੰਗ ਦੇ ਪੈਸੇ ਮੰਗਣ ਲੱਗ ਪਿਆ, ਜਿਸ ਕਰਕੇ ਦੋਵਾਂ ਧਿਰਾਂ ਵਿੱਚ ਝੜੱਪ ਸ਼ੁਰੂ ਹੋ ਗਈ ਅਤੇ ਬਾਅਦ ਵਿੱਚ ਦੋਸ਼ੀ ਤੇਜਪਾਲ ਨੇ ਆਪਣੇ ਸਾਥੀਆਂ ਨੂੰ ਮੌਕੇ ‘ਤੇ ਬੁਲਾ ਕੇ ਜਤਿਨ ਅਤੇ ਮਨਵੀਰ ਦੀ ਕੁੱਟਮਾਰ ਕੀਤੀ ਅਤੇ ਜਤਿਨ ਦੇ ਜੇਬ ਵਿੱਚੋਂ ਉਸਦਾ ਮੋਬਾਈਲ ਸੈਮਸੰਗ 6 ਧੱਕੇ ਨਾਲ ਕੱਢ ਲਿਆ ਗਿਆ। ਥਾਣਾ ਕੋਤਵਾਲੀ ਪੁਲਸ ਨੇ ਉਕਤ ਦੋਸ਼ੀਆਂ ਦੇ ਖਿਲਾਫ 323,379ਬੀ, 506,34 ਆਈ.ਪੀ.ਸੀ. ਤਹਿਤ ਮਾਮਲਾ ਦਰਜ਼ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।