ਘਰ ‘ਚੋਂ ਗਹਿਣੇ ਤੇ ਲੱਖਾਂ ਦੀ ਨਕਦੀ ਚੋਰੀ

ਪਟਿਆਲਾ, 4 ਮਾਰਚ (ਰੁਪਿੰਦਰ ਸਿੰਘ) : ਸਨੌਰ ਵਿਖੇ ਇਕ ਘਰ ਵਿਚੋਂ ਸੋਨੇ-ਚਾਂਦੀ ਦੇ ਗਹਿਣੇ ਤੇ ਲੱਖਾਂ ਦੀ ਨਕਦੀ ਚੋਰੀ ਹੋ ਗਈ ਹੈ। ਇਸ ਸਬੰਧੀ ਪੁਲਿਸ ਨੇ ਅਣਪਛਾਤਿਆਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਸਨੌਰ ਮੁਖੀ ਗੁਰਨਾਮ ਸਿੰਘ ਨੇ ਦੱਸਿਆ ਕਿ ਅਜੀਤ ਰਾਏ ਅਨੁਸਾਰ ਉਸ ਦੀ ਮਾਤਾ ਘਰ ਵਿਚ ਇਕੱਲੀ ਰਹਿੰਦੀ ਹੈ, ਜੋ ਕਿ ਬੀਤੇ ਦਿਨੀਂ ਜਾਖਲ ਗਈ ਸੀ। ਅੱਜ ਸਵੇਰੇ ਅਜੀਤ ਰਾਏ ਆਪਣੀ ਮਾਤਾ ਦੇ ਘਰ ਆਇਆ ਤਾਂ ਤਾਲੇ ਟੁੱਟੇ ਹੋਏ ਸਨ ਤੇ ਸਾਰਾ ਸਾਮਾਨ ਖਿਲਰਿਆ ਹੋਇਆ ਸੀ। ਥਾਣਾ ਮੁਖੀ ਨੇ ਦੱਸਿਆ ਕਿ ਸੂਚਨਾ ਮਿਲਦਿਆਂ ਹੀ ਫਿੰਗਰ ਪ੍ਰਿੰਟ ਮਾਹਰਾਂ ਤੇ ਪੁਲਿਸ ਟੀਮ ਨੇ ਮੌਕੇ ‘ਤੇ ਪੁੱਜੇ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਫਿਲਹਾਲ ਅਜੀਤ ਰਾਏ ਦੀ ਸ਼ਿਕਾਇਤ ‘ਤੇ ਅਣਪਛਾਤਿਆਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ ਤੇ ਚੋਰਾਂ ਨੂੰ ਜਲਦ ਕਾਬੂ ਕਰ ਲਿਆ ਜਾਵੇਗਾ। ਅਜੀਤ ਰਾਏ ਦੀ ਮਾਤਾ ਨੇ ਦੱਸਿਆ ਕਿ ਉਸ ਦੇ ਤਿੰਨ ਲੜਕੇ ਹਨ, ਜਿਨਾਂ ਵਿਚੋਂ ਇਕ ਸਨੌਰ, ਇਕ ਵਿਦੇਸ਼ ਤੇ ਇਕ ਬਠਿੰਡਾ ਰਹਿੰਦਾ ਹੈ। ਬੀਤੇ ਦਿਨ ਕਿਸੇ ਕੰਮ ਉਹ ਜਾਖਲ ਗਈ ਸੀ ਤੇ ਚੋਰਾਂ ਨੇ ਤਾਲੇ ਤੋੜ ਕੇ ਗਹਿਣੇ ਤੇ ਨਕਦੀ ਚੋਰੀ ਕਰ ਲਈ ਹੈ। ਉਨ੍ਹਾਂ ਦੱਸਿਆ ਕਿ ਘਰ ਵਿਚ 15 ਤੋਲੇ ਸੋਨਾ, ਕਰੀਬ ਅੱਧਾ ਕਿੱਲੋ ਚਾਂਦੀ ਅਤੇ 3 ਲੱਖ ਰੁਪਏ ਦੀ ਨਕਦੀ ਪਈ ਸੀ, ਜੋ ਕਿ ਚੋਰੀ ਹੋ ਗਈ ਹੈ।