ਪੁੱਤਰ ਦੀ ਕਮਾਈ ਦੇ ਹੱਕ ਦੇ ਪੈਸੇ ਮੰਗਣ ਗਈ ਔਰਤ ਦੀ ਬੇਸਬਾਲ ਬੈਟ ਨਾਲ ਕੀਤੀ ਕੁੱਟਮਾਰ

ਪਟਿਆਲਾ, 10 ਮਾਰਚ (ਰੁਪਿੰਦਰ ਸਿੰਘ) : ਥਾਣਾ ਸਿਵਲ ਲਾਇਨ ਪਟਿਆਲਾ ਦੀ ਪੁਲਸ ਨੇ ਔਰਤ ਅਤੇ ਉਸਦੇ ਪੁੱਤਰ ਦੀ ਬੇਸਬਾਲ ਬੈਟ ਨਾਲ ਕੁੱਟਮਾਰ ਕਰਨ ਵਾਲੇ ਦੋਸ਼ੀ ਵਿਅਕਤੀ ਦੇ ਖਿਲਾਫ ਮਾਮਲਾ ਦਰਜ਼ ਕੀਤਾ ਹੈ। ਦੋਸ਼ੀ ਵਿਅਕਤੀ ਦੀ ਪਹਿਚਾਣ ਸੁਨੀਲ ਕੁਮਾਰ ਵਾਸੀ ਨੇੜੇ ਪੈਟਰੋਲ ਪੰਪ ਸਾਹਮਣੇ ਮਹਿੰਦਰਾ ਕਾਲਜ਼ ਪਟਿਆਲਾ ਵਜੋਂ ਹੋਈ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਅਕਾਸ਼ ਪੁੱਤਰ ਓਮ ਪ੍ਰਕਾਸ਼ ਵਾਸੀ ਧੀਰੂ ਨਗਰ ਪਟਿਆਲਾ ਨੇ ਦੱਸਿਆ ਕਿ ਉਸ ਸੁਨੀਲ ਕੁਮਾਰ ਦੇ ਕੋਲ ਵਾਸ਼ਿੰਗ ਲਈ ਲੱਗਾ ਸੀ, ਜਿਸ ਦੇ ਮਹੀਨੇ ਦੇ ਬਣੇ ਕੁੱਝ ਪੈਸੇ ਤਾਂ ਦੋਸ਼ੀ ਵਿਅਕਤੀ ਨੇ ਦੇ ਦਿੱਤੇ ਅਤੇ ਬਾਕੀ ਨਹੀਂ ਦਿੱਤੇ ਅਤੇ ਜਦੋ ਉਸਦੀ ਮਾਤਾ ਬਾਕੀ ਬਚਦੇ ਪੈਸੇ ਲੈਣ ਗਈ ਤਾਂ ਉਕਤ ਦੋਸ਼ੀ ਵਿਅਕਤੀ ਨੇ ਅਕਾਸ਼ ਅਤੇ ਉਸਦੀ ਮਾਤਾ ਦੀ ਬੇਸਬਾਲ ਬੈਟ ਨਾਲ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ ਅਤੇ ਗਾਲੀ ਗਲੋਚ ਵੀ ਕੀਤੀ ਗਈ। ਪੁਲਸ ਨੇ ਉਕਤ ਦੋਸ਼ੀ ਵਿਅਕਤੀ ਦੇ ਖਿਲਾਫ 323,341,506 ਆਈ.ਪੀ.ਸੀ. ਤਹਿਤ ਮਾਮਲਾ ਦਰਜ਼ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।