ਅਣ-ਅਧਿਕਾਰਤ ਜਲ ਸਪਲਾਈ ਤੇ ਸੀਵਰੇਜ ਕੁਨੈਕਸ਼ਨ ਨਿਯਮਤ ਕਰਾਉਣ ਦਾ ਮੌਕਾ: ਰਾਜੇਸ਼ ਤ੍ਰਿਪਾਠੀ

ਮਲੇਰਕੋਟਲਾ 09 ਸਤੰਬਰ

ਪੰਜਾਬ ਸਰਕਾਰ ਵੱਲੋਂ ਸਥਾਨਕ ਸਰਕਾਰਾਂ ਵਿਭਾਗ ਰਾਹੀਂ ਸ਼ਹਿਰੀ ਖੇਤਰਾਂ ਵਿੱਚ ਅਣ-ਅਧਿਕਾਰਤ ਜਲ ਸਪਲਾਈ ਅਤੇ ਸੀਵਰੇਜ ਦੇ ਕੁਨੈਕਸ਼ਨਾਂ ਨੂੰ ਨਿਯਮਤ ਕਰਨ ਦਾ ਵਿਸ਼ੇਸ਼ ਮੌਕਾ ਦਿੱਤਾ ਗਿਆ ਹੈ। ਇਹ ਜਾਣਕਾਰੀ ਦਿੰਦੇ ਹੋਏ ਵਧੀਕ ਡਿਪਟੀ ਕਮਿਸ਼ਨਰ (ਸ਼ਹਿਰੀ ਵਿਕਾਸ ) ਸ੍ਰੀ ਰਾਜੇਸ਼ ਤ੍ਰਿਪਾਠੀ ਨੇ ਦੱਸਿਆ ਕਿ ਜਿਹੜੇ ਵਿਅਕਤੀਆਂ ਦੇ ਵਾਟਰ ਸਪਲਾਈ ਤੇ ਸੀਵਰੇਜ ਦੇ ਅਣ-ਅਧਿਕਾਰਤ ਕੁਨੈਕਸ਼ਨ ਹਨ, ਉਨ੍ਹਾਂ ਨੂੰ ਅਜਿਹੇ ਕੁਨੈਕਸ਼ਨ ਯਕਮੁਸ਼ਤ ਰਾਸ਼ੀ ਜਮਾਂ ਕਰਾਉਣ ‘ਤੇ ਨਿਯਮਤ (ਰੈਗੂਲਰ) ਕਰਵਾਉਣ ਦਾ ਮੌਕਾ ਪੰਜਾਬ ਸਰਕਾਰ ਦੀਆਂ ਹਦਾਇਤਾਂ ਅਨੁਸਾਰ ਦਿੱਤਾ ਜਾਵੇਗਾ।ਉਨ੍ਹਾਂ ਹੋਰ ਦੱਸਿਆ ਕਿ ਫ਼ੀਸ ਜਮਾਂ ਕਰਾਉਣ ਮਗਰੋਂ ਕੋਈ ਹੋਰ ਚਾਰਜਿਜ਼ ਜਿਵੇਂ ਰੋਡ ਕਟਿੰਗ, ਕੁਨੈਕਸ਼ਨ ਫ਼ੀਸ ਤੇ ਸਕਿਉਰਿਟੀ ਆਦਿ ਨਹੀਂ ਲੱਗਣਗੇ। ਵਰਤੋਂਕਾਰ ਦੇ ਨਾਮ ‘ਤੇ ਜਾਰੀ ਜਲ ਸਪਲਾਈ ਤੇ ਸੀਵਰੇਜ ਕੁਨੈਕਸ਼ਨ ਨੂੰ ਮਾਲਕੀ ਦਾ ਸਬੂਤ ਨਹੀਂ ਮੰਨਿਆ ਜਾਵੇਗਾ।

ਵਧੀਕ ਡਿਪਟੀ ਕਮਿਸ਼ਨਰ (ਸ਼ਹਿਰੀ ਵਿਕਾਸ ) ਨੇ ਦੱਸਿਆ ਕਿ ਇਸ ਸਬੰਧੀ 25 ਅਗਸਤ 2021 ਨੂੰ ਨੋਟੀਫ਼ਿਕੇਸ਼ਨ ਜਾਰੀ ਕੀਤਾ ਗਿਆ ਹੈ ਜਿਸ ਤਹਿਤ ਨੋਟੀਫ਼ਿਕੇਸ਼ਨ ਜਾਰੀ ਹੋਣ ਤੋਂ 03 ਮਹੀਨਿਆਂ ਦੇ ਅੰਦਰ ਕੋਈ ਜੁਰਮਾਨਾ ਨਹੀਂ ਲੱਗੇਗਾ ।ਜੇਕਰ ਕੋਈ ਵਿਅਕਤੀ 3 ਮਹੀਨੇ ਦੇ ਅੰਦਰ ਅੰਦਰ ਕੁਨੈਕਸ਼ਨ ਮਨਜ਼ੂਰ ਨਹੀਂ ਕਰਵਾਉਂਦਾ ਤਾਂ ਕੁਨੈਕਸ਼ਨ ਨਿਯਮਿਤ ਕਰਵਾਉਣ ਮੌਕੇ ਉਪਰੋਕਤ ਫ਼ੀਸ ਤੇ ਜੁਰਮਾਨਾ ਵਸੂਲਿਆ ਜਾਵੇਗਾ। ਜੇਕਰ ਕੋਈ ਵਰਤੋਂਕਾਰ ਨੋਟੀਫ਼ਿਕੇਸ਼ਨ ਤੋਂ 6 ਮਹੀਨੇ ਦੇ ਅੰਦਰ ਅੰਦਰ ਕੁਨੈਕਸ਼ਨ ਰੈਗੂਲਰ ਨਹੀਂ ਕਰਵਾਉਂਦਾ ਤਾਂ ਕੁਨੈਕਸ਼ਨ ਕੱਟ ਦਿੱਤਾ ਜਾਵੇਗਾ ਤੇ ਬਕਾਇਆ ਯੂਜ਼ਰ ਚਾਰਜਿਜ਼ ‘ਤੇ ਜੁਰਮਾਨਾ ਅਤੇ ਵਿਆਜ ਪਵੇਗਾ। ਇਸ ਮੌਕੇ ਉਨ੍ਹਾਂ ਸ਼ਹਿਰ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਜੇਕਰ ਅਜੇ ਤੱਕ ਕਿਸੇ ਸ਼ਹਿਰੀ ਨੇ ਆਪਣਾ ਜਲ ਸਪਲਾਈ ਤੇ ਸੀਵਰੇਜ ਕੁਨੈਕਸ਼ਨ ਰੈਗੂਲਰ ਨਹੀਂ ਕਰਵਾਇਆ ਜਾਂ ਭਰਨ ਯੋਗ ਮੂਲ ਰਕਮ ਨਹੀਂ ਭਰੀ ਤਾਂ ਉਹ ਤੁਰੰਤ ਇਸ ਸਕੀਮ ਦਾ ਲਾਹਾ ਲਵੇ।

ਵਧੀਕ ਡਿਪਟੀ ਕਮਿਸ਼ਨਰ (ਸ਼ਹਿਰੀ ਵਿਕਾਸ ) ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ 125 ਵਰਗ ਗਜ਼ ਤੱਕ ਘਰੇਲੂ ਥਾਵਾਂ ਲਈ 100 ਰੁਪਏ ਪ੍ਰਤੀ ਪਾਣੀ ਦੀ ਸਪਲਾਈ ਅਤੇ 100 ਰੁਪਏ ਹੀ ਪ੍ਰਤੀ ਸੀਵਰੇਜ ਕੁਨੈਕਸ਼ਨ ਦੇ ਕੁੱਲ 200 ਰੁਪਏ ਵਸੂਲੇ ਜਾਣਗੇ। ਇਸੇ ਤਰਾਂ 125 ਤੋਂ 250 ਵਰਗ ਗਜ਼ ਤੱਕ ਘਰੇਲੂ ਥਾਵਾਂ ਲਈ 250 ਰੁਪਏ ਪ੍ਰਤੀ ਪਾਣੀ ਦੀ ਸਪਲਾਈ ਅਤੇ 250 ਰੁਪਏ ਹੀ ਪ੍ਰਤੀ ਸੀਵਰੇਜ ਕੁਨੈਕਸ਼ਨ ਦੇ ਕੁੱਲ 500 ਰੁਪਏ ਵਸੂਲੇ ਜਾਣਗੇ। 250 ਵਰਗ ਗਜ਼ ਤੋਂ ਵੱਧ ਖੇਤਰ ਵਾਲੀਆਂ ਘਰੇਲੂ ਥਾਵਾਂ ਲਈ 500 ਰੁਪਏ ਪ੍ਰਤੀ ਪਾਣੀ ਦੀ ਸਪਲਾਈ ਕੁਨੈਕਸ਼ਨ ਅਤੇ 500 ਰੁਪਏ ਹੀ ਪ੍ਰਤੀ ਸੀਵਰੇਜ ਕੁਨੈਕਸ਼ਨ ਦੇ (ਕੁੱਲ 1000 ਰੁਪਏ) ਵਸੂਲੇ ਜਾਣਗੇ।

ਇਸੇ ਤਰ੍ਹਾਂ 250 ਵਰਗ ਗਜ਼ ਤੱਕ ਵਪਾਰਕ/ਸੰਸਥਾਗਤ ਥਾਵਾਂ ਲਈ 500 ਰੁਪਏ ਪ੍ਰਤੀ ਪਾਣੀ ਦੀ ਸਪਲਾਈ ਅਤੇ 500 ਰੁਪਏ ਹੀ ਪ੍ਰਤੀ ਸੀਵਰੇਜ ਕੁਨੈਕਸ਼ਨ ਦੇ ਕੁੱਲ 1000 ਰੁਪਏ ਵਸੂਲੇ ਜਾਣਗੇ। ਇਸੇ ਤਰਾਂ 250 ਵਰਗ ਗਜ਼ ਤੋਂ ਵੱਧ ਵਪਾਰਕ ਥਾਵਾਂ ਲਈ 1000 ਰੁਪਏ ਪ੍ਰਤੀ ਪਾਣੀ ਦੀ ਸਪਲਾਈ ਅਤੇ 1000 ਰੁਪਏ ਹੀ ਪ੍ਰਤੀ ਸੀਵਰੇਜ ਕੁਨੈਕਸ਼ਨ ਦੇ ਕੁੱਲ 2000 ਰੁਪਏ ਵਸੂਲੇ ਜਾਣਗੇ।

————————-